KazNARU СТУДЕНТТЕРІ «IMD Company» ЖШС КӨЛІК-ЛОГИСТИКАЛЫҚ ТЕРМИНАЛДЫҚ КЕШЕНІНДЕ
Қазақ ұлттық аграрлық зерттеу университетінің «Инженерлік технологиялар» факультеті И.В.Сахаров атындағы «Көлік техникасы және технологиялары» кафедрасының ұйымдастыруымен бір топ студент өндірістік практика аясында «IMD Company» ЖШС-нің көлік-логистикалық терминалдық кешеніне оқу-танымдық экскурсияға барып қайтты.
6В11301 – Көлікті пайдалану және жүк қозғалысы мен тасымалдауды ұйымдастыру және 6В11302 – Логистика (сала бойынша) білім беру бағдарламалары бойынша білім алып жатқан 2 – 3 курс студенттерін кафедра меңгерушісі, PhD, қауымдастырылған профессор Марат Кенжалыұлы бастап барды. Сондай-ақ, техника ғылымдарының кандидаты, қауымдастырылған профессор Мизамбек Төкенұлы, инженер Еламан Русланұлы студенттерге жетекшілік жасады.
«IMD Company» ЖШС – заманауи көлік-логистикалық қызмет түрлерін кешенді түрде ұсынатын жетекші кәсіпорындардың бірі. Экскурсия аясында компанияның өндірістік директоры Ардақ Саматұлы студенттерге логистикалық тізбектің ұйымдастырылу барысы, жүктерді қабылдау мен тиеу-түсіру үдерістері, контейнерлік тасымалдарды басқарудың заманауи әдістері мен ақпараттық жүйелердің қолданылуын түсіндіріп, өндірістік жағдайда нақты қолдануын көрсетті.
Сонымен қатар, студенттер Atasu Group компаниясының заманауи инфрақұрылымымен, оның ішінде арнайы контейнерлік алаңдарда, жабық және ашық қоймаларда, уақытша сақтау қоймаларында жүзеге асырылатын жүк сақтау және өңдеу технологиялық процестерімен жан-жақты танысты.
Аталған іс-шара студенттердің теориялық білімдерін өндірістік тәжірибемен ұштастыруына, логистикалық процестердің нақты жұмыс барысымен танысуларына және болашақ маман ретіндегі кәсіби бағыт-бағдарын нығайтуына мүмкіндік бергені анық.
Ардақ Саматұлы университетпен тұрақты ынтымақтастық орнатуды ұсына отырып, оқу ордасын бітіруші білікті жас мамандарды болашақта компанияға жұмысқа қабылдау мәселесін қарастыруға дайын екендігін атап өтті. Өз кезегінде мұндай қолдау – студенттердің еңбек нарығында өз орнын табуына және мансап жолын бастауына зор ықпалы болмақ.
KazNARU Баспасөз қызметі
