КӨКТЕМГІ ЕМТИХАН АЯҚТАЛДЫ: КӨЛСАЙ МЕН ШАРЫНДАҒЫ КӨҢІЛДІ САЯХАТ
Қазақ ұлттық аграрлық зерттеу университетінің «Инженерлік технологиялар» факультетінің 1-курс студенттері көктемгі емтихан сессиясын табысты аяқтап, жексенбі күні Қазақстанның табиғи жауһарлары – Көлсай көлі мен Шарын шатқалына саяхаттап қайтты.
«Бұл сапардың басты мақсаты – табиғат аясында демалу ғана емес, студенттердің аса жауапты сессиядан кейінгі рухани, эмоционалдық көңіл-күйін қалпына келтіру, жастар арасында бейформалды қарым-қатынас орнату, командалық рухты нығайту, сонымен қатар туған өлкенің табиғи сұлулығын таныту арқылы экологиялық сана мен отансүйгіштік сезімді дамыту» - дейді факультет деканы Ләззат Әлдібаева.
Экскурсия барысында жастар Алатау баурайындағы ғажайып өңірлер – Көлсай мен Шарын шатқалының табиғи-географиялық ерекшеліктерін, флорасы мен фаунасын тамашалап, үлкен әсерге бөленді.
Жыл бойы үздіксіз білім алып, емтихан сынағынан абыроймен өткен студенттер арнайы автобус бөліп, қолдау көрсеткен университет басшылығына өз ризашылықтарын білдірді!
KazNARU Баспасөз қызметі
